Servicecard

Sammelquietens
De Regels för dat Tobetahlen för Medizin gellen bit hento en Belasten van 2%, bi chronisk Kranken bit hento 1% van dat Bruttoinkomen. Wenn Se over disse Grenz komen, könen Se sük van Hör Krankenkass befrejen laten. De Kass overnimmt denn för de Rest van ’t Jahr all de Kosten, de d’rover rutgahn. Daarmit Se, wenn dat nödig is, neet all Belege enkelt sammeln un upbewahren mutten, könen Se sük mit Hör Servicekaard heel eenfach Sammelquietens utstellen laten.

Medizin up Vörrad
Wenn Se de Servicekaard bruken, stahnt wi daarför liek, dat immer en Vörrad van Hör Medizin bi uns liggt. Uns Aptheken-Computer stellt seker, dat wi immer levern könen. De Medizin, de Se stadig bruken, word van uns, wenn 't nödig is, nabestellt un liggt denn as Vörrad bi uns.

Keen Raakwark, keen faste Verdrag (Bindung)
De Servicekaard köst nix un verplicht to nix. De Kaard kann to elke Tied torügg geven worden. Wi verplichten uns, Hör Daten heel un dall unnerhands to hollen. Se worden blot bruukt, wenn wi Hör as Andragsteller beraden mutten. Dat wi de Daten an anner Lüü wiedergeven, is utsloten. Wenn Se dat willen, könen wi Hör Daten to elke Tied lösken.

Stadigheid
Mit de Servicekaard könen wi Hör mit de Medizin noch extra Henwiesen un Tipps geven un Hör dat hele Jahr automatisk mit Utkummsten för Hör Gesundheit versörgen. Wi weten, wat för en Hostensaft Hör in d’ lesde Winter hulpen hett – of wat för en Lüchtschutzfaktor Hör Sünnenschutzmiddel harr. Akkeraat topaßt Tipps un Raadslagen för stüttende Maßnahmen helpen, feller weer gesund to worden. Ok wenn tomaal Risiken uptreden of en Medizin torügg ropen word, könen wi Hör futt en Naricht tokomen laten.

Bestmögelk Sekerheid
Mit de Servicekaard weten wi heel akkraat, welke Medizin Se al kregen hebben. Wi sehn tomaal, wenn Hör Medizin sük neet mit anner Middels, de Se bi uns köfft hebben, verdragen deit. Denn könen wi Hör seggen, of de Middels sük villicht tegensiedig wat doon (Wechselwirkungen) of sük neet mitnanner verdragen (Unverträglichkeiten). Wi könen ok mit Hör Dokter Rückspraak hollen. Sogaar na en langerde Tied is dat noch mögelk, Hör utföhrelk Utkunft over Hör Medizin un all wichtig Delen to geven: wennehr dat weer, wovööl dat weer, wat daar genau in weer usw.

Utwies för Befrejen
Mit uns Servicekaard bruken Utwiesen för Befrejen neet mehr vörleggt worden, so lang, as se gellen.

Priesvördeel
Wenn Se persönelk in uns Aptheek komen, kriegen Se mit de Servicekaard automatisk upstünds 3% Rabatt up all Serviceleistens un up all Saken ut uns Sülvstnehmregalen.

Privatpatienten
Mit uns Servicekaard könen Privatpatienten an dat Lastschriftverfahren deelnehmen. Dit bedüdd, dat de Reken eerst na veer Weken van uns intrucken word.